சூடான இடுகைகள் குறித்து சில்லென்று ஒரு பார்வை

நேற்று நடந்த சென்னைப்பதிவர் – தமிழ்மணம் நிர்வாகிகள் சந்திப்பில் விவாதிக்கப்பட்ட பல தலைப்புகளில் ஒன்று சூடான இடுகைகள் பற்றியது.

இது குறித்து எனக்கு தெரிந்த தகவல்களை எழுதுகிறேன்.

வழக்கமான டிஸ்கி : நான் கணினி கைநாட்டு (கம்ப்யூட்டர் இல்லிடரேட்) எனவே நான் கூறுவது தவறாக கூட இருக்கலாம்
-oOo-
ஒரு பதிவர் எழுதும் இடுகை மூன்று விதமாக படிக்கப்படுகிறது

• நேரடியாக அந்த பதிவின் முகவரியை உலாவியில் உள்ளிடுவதன் மூலம். இதன் மூலம் நாம் html வடிவிலான பக்கங்களை படிக்கிறோம்.
• செய்தியோடை (RSS Feeds) மூலமாக. ப்லாக்லைன்ஸ் (Bloglines), கூகிள் ரீடர் (Google Reader) ஆகியவற்றின் மூலமாக இப்படி படிக்கலாம்
• திரட்டிகளின் மூலமாக - தமிழ்மணம், தேன்கூடு, திரட்டி, தமிழ்வெளி போன்றவை திரட்டிகளாகும்

இதில் சூடான இடுகை என்றால் என்ன

தமிழ்மணம் மூலம் - அதாவது தமிழ்மணத்தில் உள்ள பதிவின் (இன்னமும் சரியாக சொல்லவேண்டுமென்றால் இடுகையின்) சுட்டியை சுட்டி படிப்பது குறித்த ஒரு கணக்கே சூடான இடுகை யாகும்

ஒரு இடுகையை எத்தனை பேர் / எத்தனை முறை படிக்கப்பட்டது என்பது அல்ல சூடான இடுகையின் பின்புலம் - ஒரு இடுகையை எத்தனை முறை தமிழ்மண பக்கங்களில் உள்ள சுட்டிகளின் மூலம் படிக்கப்பட்டது என்பதே சூடான இடுகையின் பின்புலம்

மாற்றி சொல்ல வேண்டுமென்றால்

ஒரு இடுகை எப்படி உள்ளது என்பதை சூடான இடுகை கூறுவதில்லை
ஒரு இடுகை மொத்தமாக எத்தனை முறை படிக்கப்பட்டது என்பது சூடான இடுகை கூறுவதில்லை
ஒரு இடுகை தமிழ்மண பக்கங்களிலிருந்து எத்தனை முறை படிக்கப்பட்டது என்பதை மட்டும் தான் சூடான இடுகை தெரிவிக்கிறது
-oOo-
எந்த இடுகை தமிழ்மண பக்கங்களிலிருந்து பல முறை படிக்கப்படிகிறது

• முகப்பில் உள்ள இடுகைகள்
• மறுமொழிகள் கீழ் உள்ள இடுகைகள்
• சூடான இடுகைகள் கீழ் உள்ள இடுகைகள்
• வாசகர் பரிந்துரை கீழ் உள்ள இடுகைகள்

-oOo-

இப்பொழுது இதில் ஒரு இடுகை அதிகம் மறுமொழிகளை பெற்றால் (அதாவது முகப்பு பக்கத்தில் மறுமொழிகளின் கீழ் உள்ள செங்குத்துவரிசையில் என்னேரமும் இருந்தால்) அவ்விடுகையை படிப்பவர்களின் எண்ணிக்கை அதிகரிக்கும். மறுமொழி அளிக்க நினைப்பவர்களின் எண்ணிக்கையும் அதிகரிக்கும். மறுமொழிகள் வந்தால் மீண்டும் அந்த இடுகை அதே செங்குத்துவரிசையில் இருக்கும் --> இவ்வாறான ஒரு ”நேர்மறை பின்னூட்ட விளைவு” நிகழ்கிறது

அதே போல் ஒரு இடுகை சூடான இடுகைகளின் கீழ் வந்தாலும், அதை அதிகம் பேர் படிக்க வாய்ப்புள்ளதால் இங்கும் அதே நேர்மறை பின்னூட்ட விளைவு நிகழ்வதால் அந்த இடுகை தொடர்ந்து சூடான இடுகையிலேயே இருக்கிறது
-oOo-
ஆனால் இவ்வாறாக வருவதற்கு முதலில் அந்த இடுகை முதல் முறை பலரால் படிக்கப்பட்டிருக்க வேண்டும்.

ஒரு நாளில் எழுதப்படும் சராசரி 400 இடுகைகளில் எந்த இடுகையை படிப்பது என்பதை ஒரு சராசரி வாசகர் முடிவு செய்வது மூன்று காரணிகளினால்

• தமிழ்மண முகப்பில் தெரியும் தலைப்பு
• முதல் 20 வார்த்தைகள் - இது அனைத்து இடுகைகளுக்கும் பொருந்தாது
• பதிவு எழுதியவர் பெயர்

-oOo-

எனவே உங்களின் இடுகையை பலர் படிக்க வேண்டுமென்றால் --> அப்படி படித்து உங்களின் இடுகை சூடான இடுகையில் வர வேண்டுமென்றால் --> அப்படி வந்ததால் மேலும் பலர் படித்து மறுமொழி அளிக்க வேண்டுமென்றால் --> அப்படி அளிப்பதன் மூலம் மறுமொழி செங்குத்து வரிசையில் உங்கள் இடுகை வரவேண்டுமென்றால் --> அப்படி வருவதன் மூலம் மேலும் பலர் படித்து சூடான இடுகையிலேயே உங்கள் இடுகை தொடர்ந்து இருக்க வேண்டுமென்றால் செய்ய வேண்டியது என்ன

1. வசீகரிக்கும் தலைப்பு - இதை மட்டுமே பலரும் பிடித்துக்கொண்டு தலைப்பு வைக்க சிரமப்படுவதாக தோன்றுகிறது

2. முதல் 20 வார்த்தைகளில் நீங்கள் சொல்ல வந்த கருத்து என்னவென்று சொல்வது

3. மிக முக்கியமான ஆனால் பலருக்கும் தெரியாத (அல்லது தெரிந்து கொள்ள மறுக்கும்) விஷயம் “இவர் நல்ல எழுத்தாளர்” என்ற பெயரை பிற எழுத்தாளர்களிடம் வாங்குவது

ஒரு உதாரணம்

• ”தசாவதாரம் பட விமர்சனமும் டைம்ஸ் ஆஃப் இந்தியா வின் கூத்தும்” என்ற இடுகையின் சுட்டியை நாம் சுட்ட அந்த தலைப்பை விட அதை எழுதிய வினையூக்கி என்ற பெயர் தான் முக்கியம். அந்த பதிவர் எழுதிய இந்த இடுகையை படிக்கலாம் என்ற எண்ணத்தை அளித்ததில் அவர் இது வரையில் எழுதிய பழைய இடுகைகளும் ஒரு காரணம் தானே
  

என்பது என் கருத்து

மேலும் ஒரு உதாரணம்

• விடுபட்டவை 15 ஜூன் 2008 என்ற தலைப்பில் ஒரு இடுகை சூடான இடுகையில் இடம்பிடிப்பதற்கு காரணம் அந்த தலைப்பு அல்ல
• விடுபட்டவை 15 ஜூன் 2008 என்ற தலைப்பில் ஒரு இடுகை சூடான இடுகையில் இடம்பிடிப்பதற்கு காரணம் அந்த இடுகையில் எழுதப்பட்டிருக்கும் விபரங்கள் அல்ல. அதில் என்ன எழுதப்பட்டிருக்கிறது என்பது தெரியாமல் தானே அந்த இடுகை படிக்கப்படுகிறது
• விடுபட்டவை 15 ஜூன் 2008 என்ற தலைப்பில் ஒரு இடுகை சூடான இடுகையில் இடம்பிடிப்பதற்கு காரணம் - இது வரை வந்த விடுபட்டவை இடுகைகள் மக்களுக்கு பிடித்துப்போனதே ஆகும்.

தலைப்பு மட்டும் தான் நன்றாக இருக்கும். உள்ளே ஒன்று இருக்காது என்ற எண்ணம் ஒரு பதிவை பற்றி பொதுவில் ஏற்பட்ட பின், அந்த பதிவர் எவ்வளவு “அறை எடுத்து யோசித்து தலைப்பு வைத்தாலும்” யாரும் சீண்ட போவதில்லை.

முத்தாய்ப்பாக

சூடான இடுகை என்பது ஒரு திறம், தரம் (quality) சார்ந்த குறியீடு அல்ல. அது ஒரு எண்ணிக்கை (quantity) சார்ந்த விடயம் என்பது ஒரு வகையில் உண்மையென்றாலும், சூடான இடுகையில் இடம் பிடிக்கும் ஒரு இடுகை அதற்கு முந்தைய இடுகைகளின் தரத்தை வெளிப்படுத்துகிறது என்று கூறுவது தவறில்லை என்பது என் கருத்து. :) :) :)

வழக்கம் போல் கருத்துக்கள் வரவேற்கப்படுகின்றன