அரசு டாக்டர்களை தாக்கினால் 10 வருடம் சிறை! - என் கருத்துக்கள்

தமிழக அரசின் அவசரச்சட்டம் குறித்த என் கருத்துக்கள்

முதலில் பத்திரிகைகளில் வந்த விபரங்கள்

டாக்டர்கள் அல்லது மருத்துவமனைகளைத் தாக்குவோருக்கு மூன்று ஆண்டுகள் முதல் 10 ஆண்டுகள் வரை சிறை தண்டனை அளிக்கவும், ஏற்படும் சேதங்களுக்கு இழப்பீட்டை வசூலிக்கவும் அவசரச் சட்டத்தை தமிழக அரசு பிறப்பித்துள்ளது. டாக்டர்கள் மட்டுமன்றி, நர்ஸ்கள், மருத்துவம் மற்றும் நர்சிங் மாணவர்கள், துணை மருத்துவப் பணியாளர்களுக்கும் பாதுகாப்பு அளிக்கும் வகையில் இந்த அவசரச் சட்டம் பிறப்பிக்கப்பட்டுள்ளது.
கவர்னர் கையெழுத்திட்டுள்ள, "தமிழ்நாடு மருத்துவச் சேவை புரிவோர் மீதான வன்முறை மற்றும் மருத்துவச் சேவை மையங்களின் சொத்துக்களுக்கு ஏற்படும் சேதம் ஆகியவற்றைத் தடுப்பதற்கான அவசரச் சட்டம், 2008' என்றழைக்கப்படும் இச்சட்டத்தில் கூறப்பட்டுள்ளதாவது:

மருத்துவச் சேவையில் ஈடுபட்டிருப்போர் மீது வன்முறையை ஏவிவிட்டு அவர்களைக் காயப்படுத்துவதும், மருத்துவச் சேவை மையங்களின் சொத்துக்களைச் சேதப்படுத்துவதும் தமிழகத்தில் அதிகரித்து வருவதால், மருத்துவர்களிடையே பதட்டம் ஏற்பட்டுள்ளது. இதனால், மருத்துவச் சேவைக்கே தமிழகத்தில் பாதிப்பு ஏற்பட்டுள்ளது.

எனவே, வன்முறையில் ஈடுபடுவோரைத் தண்டிக்கவும், அதை ஜாமீனில் வர முடியாத குற்றமாகக் கொண்டு வரவும், சொத்துகளுக்கு ஏற்பட்ட சேதங்களுக்கு இழப்பீடு வசூலித்து தருவதும் அவசியமாகிறது. சட்டசபைக் கூட்டத் தொடர் தற்போது நடக்காததால் இந்த அவசரச் சட்டம் பிறப்பிக்கப்படுகிறது.பதிவு செய்யப்பட்ட டாக்டர்கள், நர்ஸ்கள், மருத்துவ மாணவர்கள், நர்சிங் மாணவர்கள், துணை மருத்துவப் பணியாளர்கள் உட்பட மருத்துவச் சேவை புரிவோருக்கு எதிரான வன்முறைகளுக்கு இதன் மூலம் தடை விதிக்கப்படுகிறது. மேலும், தமிழகத்தில் உள்ள மருத்துவ மையங்களின் சொத்துக்களுக்குச் சேதம் விளைவிக்கவும் தடை விதிக்கப்படுகிறது.

இதன்படி, வன்முறையில் ஈடுபடுவது தண்டனைக்குரிய குற்றம். இதன்மூலம், மருத்துவச் சமூகத்தினர் எவ்வித அச்சமும் இன்றி தங்களது பணியை மேற்கொள்ளலாம்.எந்த ஒரு நபரும் தனியாகவோ, கூட்டாகவோ அல்லது அமைப்பு மூலமோ மருத்துவச் சேவை புரிவேர் மீது வன்முறையில் ஈடுபட்டால், அவர்களுக்குக் குறைந்தபட்சம் மூன்று ஆண்டுகளும், அதிகபட்சம் 10 ஆண்டுகளும் அபராதத்துடன் சிறை தண்டனை விதிக்கப்படும். இச்சட்டத்தின் கீழ் காணப்படும் குற்றச் செயல் எதுவும் ஜாமீனில் வெளிவர முடியாதவை. சொத்துக்களுக்கு ஏற்படும் சேதத்துக்கான இழப்பீட்டை கோர்ட் நிர்ணயிக்கும்.

அவ்வாறு இழப்பீட்டைத் தராத நபர்களிடம், தமிழ்நாடு வருவாய் வசூல் சட்டத்தின் கீழ் வசூலிக்கப்படும்.

மாநில, மத்திய அரசுகள் மற்றும் உள்ளாட்சி அமைப்புகள் நடத்தும் மருத்துவ மையங்கள், நோயாளிகளுக்குச் சிகிச்சை அளிக்கும் எந்தவொரு தனியார் மருத்துவமனைகள், பிரசவத்துக்கு முன்பும், பின்பும் சிகிச்சையளிக்கும் தனியார் மகப்பேறு மருத்துவமனைகள், எந்தவொரு நோய், உடல் காயம், மனநிலை சிகிச்சை போன்றவற்றை அளிக்கும் மையங்கள், இல்லங்களுக்கும் இச்சட்டம் பொருந்தும்.

சொத்து என்பது, மருத்துவர்கள் அல்லது மருத்துவ மையங்கள் சொந்தமாகவோ, பாதுகாப்பிலோ அல்லது தங்கள் கட்டுப்பாட்டிலோ வைத்திருக்கும் அசையும் அல்லது அசையா சொத்துக்கள், மருத்துவச் சாதனங்கள், மருத்துவ இயந்திரங்கள் ஆகியவையாகும். இவற்றுக்கு ஏற்படும் சேதத்துக்கு இழப்பீடு கோரலாம். இதேபோல, வன்முறை சம்பவங்கள் என்பது, மருத்துவச் சேவை புரிவோரை பணி செய்யவிடாது தடுத்தல், இடையூறு செய்தல், உயிருக்கு ஆபத்து விளைவித்தல் மற்றும் காயப்படுத்துதல் ஆகியவை ஆகும்.

இவ்வாறு அவசரச் சட்டத்தில் குறிப்பிடப்பட்டுள்ளது.

இனி இது குறித்த விளக்கங்கள்

ஒரு மருத்துவமனையில் அளிக்கப்படும் சிகிச்சை தவறு என்றால் அது குறித்து முறையாக புகார் செய்து இழப்பீட்டை பெறுவது குறித்து எந்த தடையும் இல்லை

ஆனால் பிணியாளர் இறந்தவுடன், மருத்துவமனை செலவழித்துள்ள மருந்து மற்ற இதர பொருட்களின் பணத்தை அளிக்காமல் கண்ணாடியை உடைத்து கலவரம் செய்து பணம் பறிக்கும் போக்கே இதன்மூலம் தடை செய்யப்பட்டுள்ளது.

சரி என் கருத்துக்கள்

ஒரு மருத்துவமனை தாக்கப்படுவதற்கு இரு கூறுகள்

1. மருத்துவமனை மேலான எரிச்சல்

2. கோபப்படுவது போல் நடித்து கூப்பாடு போட்டு எதையாவது உடைத்தால் / யாரையாவது அடித்தால், ஏற்கனவே செய்து கொண்ட சிகிச்சைக்கு கட்டணம் செலுத்த வேண்டாம், முடிந்தால் மேலும் மிரட்டி பணம் வாங்கலாம் என்ற எண்ணம் (அப்படி நடப்பதில்லை என்று கூற தயாராகுபவர்கள் கொஞ்சம் அக்கம் பக்கம் விசாரித்து உண்மையை தெரிந்து கொள்ளுங்கள்)

இதில் இந்த சட்டம் செய்யக்கூடியது என்ன - இரண்டாவது கூற்றத்தான் தடுக்கிறது. கட்டப்பஞ்சாயத்து செய்து மருத்துவமனை / மருத்துவரிடமிருந்து பணம் பறிக்கும் போக்கை இந்த சட்டம் தடுக்கும்.

மருத்துவமனை மேலான எரிச்சலை ஒன்றும் செய்ய முடியாது. (அது அதிகரிக்கத்தான் செய்யும் என்பது தான் என் கருத்து).

சரி முதலாவது கூற்றை பார்ப்போம் - எரிச்சல் வரும் காரணங்கள் என்ன

1. நோய் பற்றிய சரியான புரிந்து கொள்ளுதல் இல்லாமை. மெத்த படித்த வலைபதிவர்கள் பலர் எழுதும் சில கருத்துக்களை பார்தாலே மருத்துவத்துறை பற்றிய புரிந்து கொள்ளுதல் எந்த அளவில் உள்ளது என்று தெரியும். இதில் படிக்காதவர்களை பற்றி கேட்கவே வேண்டாம்.

2. மனித உடலை ஒரு கருவியாக நினைத்து அனைவரும் ஒன்று என்று நினைப்பது

3. மருத்துவமனை செலவு குறித்த அறியாமை. ஒரு வீடு கட்ட ஆகும் 5 லட்ச ரூபாயில் கொத்தனார், மேஸ்திரி, சித்தாள் கூலி 1 லட்சம். பொருட்கள் 4 லட்சம் என்று தெளிவாக தெரிந்து கொள்ளும் மக்கள், ஒரு அறுவை சிகிச்சைக்காகும் 10,000 ரூபாய் முழுவதும் மருத்துவரின் கட்டணம் என்று நினைப்பது. அதனால் மருத்துவர்கள் அதிகம் சம்பாதிப்பதாக நினைப்பது

4. பிணியாளர் இறப்பது மருத்துவமனையின் தப்பு மட்டும் என்றும், மருத்துவர்கள், மருத்துவமனைகள் அனைவரையும் உயிர் பிழைக்க வைக்க வேண்டியவர்கள் என்றும் ஒருவர் இறந்து விட்டாலோ அல்லது அறுவை சிகிச்சை வெற்றி பெற முடியவில்லை என்றாலோ அது மருத்துவரின் தவறு மட்டுமே என்று நினைப்பது

வேறு எந்த காரணங்களுக்காக உங்களுக்கு எரிச்சல் வருகிறது என்று மறுமொழியில் கூறுங்கள்.

இந்த எரிச்சலை குறைப்பது போதிய விழிப்புணர்வு மூலம் மட்டுமே முடியும். சட்டத்தால் அல்ல என்பது என்கருத்து.

அடுத்த இடுகைகள்

• மருத்துவமனை பாதுகாப்பு சட்டம் ஏன் தேவைப்பட்டது
• வன்முறை தடுப்பு சட்டம் குறித்த திணமனியின் தவறான தலையங்கத்திற்கு வரிக்கு வரி பதில்

இந்த இடுகை உங்களுக்கு பிடித்திருந்தால் மறக்காமல் வாக்களிக்கவும்.

• தமிழிஷ் தளத்தில் வாக்களிக்க இந்த சுட்டியை ஒரு முறை மட்டும் சுட்டவும் (க்ளிக் செயயவும்)
• தமிழ்மணத்தில் ஆதரவு வாக்களிக்க கீழுள்ள கருவிபட்டையில் மேல்நோக்கியுள்ள கைவிரலை சொடுக்கவும்

எவ்வளவு பிடித்தது என்பதை கீழே உள்ள நட்சத்திரங்களை சுட்டுவதன் மூலமும் தெரிவிக்கலாம்

Opinion

இந்த வலைபதிவிற்கு நேரடியாக (உலாவி மூலம்) வராமல் செய்தியோடை மூலமாகவும் இடுகைகளை தொடர்ந்து வாசிக்கலாம். செய்தியோடையை பெற இங்கு சுட்டவும்