வெண்குழல் வத்தி / பொது இடங்களில் புகை பிடிக்க தடை குறித்து ஒரு கேள்வி பதில்

பாதி படிக்கும் போது தூக்கம் வந்தால் பத்தாவது முதல் பதினான்காவது வரை ஐந்து கேள்வி பதில்களை மட்டுமாவது படியுங்கள்

கேள்வி 1: வெண்குழல்வத்திக்கு தடையா
பதில் 1 : இல்லை. பொது இடங்களில் வெண்குழல் வத்தி பிடித்து அடுத்தவர் முகத்தில் புகை ஊதுவதற்கு மட்டும் தான் தடை

கேள்வி 2: அப்படியானால் புகை பிடிப்பதற்கு தடையில்லையா
பதில் 2: இல்லை. உங்கள் வீட்டினும் , உங்கள் விடுதி அறைக்குள் நீங்கள் புகை பிடிக்க எந்த தடையும் இல்லை

கேள்வி 3: மத்திய அரசு ஒரு பொது மக்களுக்கு எதிரான சட்டம் இயற்றியுள்ளது என்று சொல்கிறார்களே
பதில் 3: கண்டிப்பாக இல்லை. இது பொது மக்களுக்கு எதிரானது அல்ல. புகை பிடிப்பவர்களுக்கு, அதுவும் பொது இடங்களில் புகை பிடிப்பவர்களுக்கு எதிரான சட்டம் தான் இது

கேள்வி 4: ஏன் வெண்குழல்வத்தி விற்பனை தடைசெய்யப்படவில்லை
பதில் 4: ஏனென்றால் புகைப்பிடிக்க தடை ஒன்றும் இல்லை. பொது இடங்களில் புகைபிடிக்கத்தான் தடை. முற்றிலும் தடை செய்யப்பட்ட ஒரு பொருளின் விற்பனையை வேண்டுமானல் தடை செய்யலாமே தவிர அறைக்குள் பயன் படுத்த அனுமதிக்கப்படும் ஒருபொருளை தடை செய்வது எந்த விதத்திலும் நியாயம் அல்ல.

கடையில் விற்கப்படும் அனைத்து பொருட்களையும் நான் பொது இடத்தில் பயன்படுத்த அனுமதி தர வேண்டும் என்பது சரியான வாதமாக எனக்கு தோன்றவில்லை. உதாரணமாக ஆணுறையை எடுத்துக்கொள்ளுங்கள். அதை அறைக்குள் உபயோகிக்க வேண்டும் !!!. “கடையில் விற்பதால் சாலையில், பூங்காவில் புகைபிடிக்க அனுமதிக்க வேண்டும்” என்பது எப்படிப்பட்ட வாதம் என்பதை கடையில் விற்கிறார்கள், அதனால் ஆணுறையை நான் சாலையில் பயன்படுத்துவேன் என்பது எவ்வளவு எப்படிப்பட்ட வாதம் என்று சிந்திப்பது மூலம் புரிந்து கொள்ளலாம்

கேள்வி 5: ஒருவர் வெண்குழல் வத்தி உபயோகிப்பதால் அடுத்தவருக்கு என்ன நஷ்டம்
பதில் 5: ஒருவர் வெண்குழல் வத்தி உபயோகிப்பதால் அவரும் பாதிக்கப்படுகிறார். அந்த புகையை சுவாசிக்கும் அனைவரும் பாதிக்கப்படுகிறார்கள்.

உதாரணமாக போதை ஊசி போட்டுக்கொள்வது என்பது 20ஆவது மாடியில் இருந்து தனியாக குதிப்பது என்றால் தனியாக அறைக்கும் புகைபிடிப்பதும் 20ஆவது மாடியில் இருந்து தனியாக குதிப்பது. ஆனால் புகைப்பழக்கம் இல்லாத அடுத்தவர் முன்னிலையில் புகைபிடிப்பது இருபதாவது மாடியில் நின்று கொண்டு, உங்கள் காலுடன் அங்கு நிற்கும் அனைவரில் காலையும் சேர்த்து கட்டிக்கொண்டு நீங்கள் குதிப்பது.

கேள்வி 6: சாலையில் செல்லும் வாகனங்களின் புகையை விட வெண்குழல்வத்தியில் புகை கேடானதா
பதில் 6: ஆம். உதாரணமாக சாலையில் செல்லும் அனைத்து வாகனங்களையும் ஒரே போல் பார்க்க கூடாது. பல வாகனங்கள் மாசு கட்டுப்பாட்டு விதிகளுக்கு உட்பட்டு தான் இருக்கின்றன. சில வாகனங்கள் தான் அதிக புகை கக்குகின்றன. ஆனால் அனைத்து வெண்குழல் வத்திகளும் ஒன்று தான்.

கேள்வி 7: விமானங்களில் இருந்து வரும் புகையை விட இது கேடானதா
பதில் 7: ஆம்

கேள்வி 8: எப்படி
பதில் 8: கல்நெய் (பெட்ரோல்) போன்ற வேதிப்பொருட்களை எரிக்கும் போது வருவது பெரும்பாலும் கரியமில வாயு தான். இதனால் புவி வெப்பமடைவது அதிகரிக்கிறது. ஆனால் அதில் இருக்கும் நச்சு வேதிப்பொருட்கள் குறைவு. ஆனால் புகைபிடிப்பதால் ஆயிரக்கணக்கான நச்சு வேதிப்பொருட்கள் புகைப்பவரின் உடலினுள்ளும், அதே நேரம் அருகில் இருக்கும் நபர்களின் உடலினுள்ளும் செல்கின்றன

கேள்வி 9: இது குறித்த விஞ்ஞானப்பூர்வ ஆதாரம் இருக்கிறதா
பதில் 9: இருக்கிறது. பல விஞ்ஞானப்பூர்வ ஆய்வுகளில் வெண்குழல் வத்தியின் ஆபத்து குறித்து தெளிவாக இருக்கிறது. ஆர்வமிருப்பவர்கள் Smoking and Health, the initial report of the Advisory Committee to the Surgeon General of the Public Health Services in 1964, Report of the Royal College of Physicians, London : Smoking or Health 1977 ஆகிய ஆய்வு அறிக்கைகளை படிக்கலாம்

கேள்வி 10: என்னால் புகைபிடிப்பதை நிறுத்த முடியவில்லை. நான் என்ன செய்ய
பதில் 10: வீட்டினுள் புகைபிடிக்க வேண்டியது தான்

கேள்வி 11: நான் காலை யில் 6 மணிக்கே வீட்டை விட்டு கிளம்பி விடுகிறேன். மாலை 8 அல்லது 9 மணிக்கு தான் வீட்டிற்கு அல்லது அறைக்கு திரும்புகிறேன். நான் 12 மணிநேரம் புகை பிடிக்க வில்லை என்றால் என்னால் வேலை செய்ய முடியவில்லை
பதில் 11: வெண்குழல்வத்தியில் இருக்கும் நிகோடின் என்ற பொருள் தான் உங்களை பழக்கவடிமை (Addict) ஆக்குவது. ஆனால் அதிலிருக்கும் பிற பொருட்கள் தான் புற்றுநோயை உருவாக்குகின்றன. எனவே நிகோடினை மட்டும் உட்கொண்டால் நீங்கள் பழக்கவடிமை ஆக இருப்பதை தொடர்ந்தாலும், புற்றுநோய் அபாயங்கள் பெரிதும் குறைகின்றன. அடுத்த முக்கிய விஷயம் – நீங்கள் உட்கொள்ளும் நிகோடினால் அடுத்தவருக்கு பாதிப்பு கிடையாது.

கேள்வி 12: இந்த நிகோடினை மட்டும் எப்படி தனியாக உட்கொள்வது
பதில் 12: கடைகளில் நிகோடின் தோல்திட்டு (Nicotine Patch) கிடைக்கிறது . அதை வாங்கி தோலில் ஒட்டிக்கொண்டால் போதும். இரத்திற்குள் நிகோடின் சென்று கொண்டிருக்கும். அதனால் மூளைக்கு நிக்கோடின் தொடர்ந்து செல்வதால் புகை பிடிக்க வேண்டும் என்ற எண்ணம் பெருமளவில் கட்டுப்படும்

கேள்வி 13: பொது இடங்களில் இந்த தோல்திட்டை உபயோகிக்க தடையில்லையா
பதில் 13: இல்லை

கேள்வி 14: இது ஒரு தலை பட்சமானதில்லையா
பதில் 14: புகைபிடிப்பதற்கும், தோல்திட்டை பயன்படுத்துவதற்கும் முக்கிய வேறுபாடுகள் இருக்கின்றன

முதல் வேறுபாடு : தோல் திட்டை நீங்கள் மட்டும் பயன் படுத்துகிறீர்கள். (20ஆவது மாடியில் இருந்து தனியாக குதிக்கிறீர்கள்). ஆனால் புகைபிடிப்பது அனைவரையும் பாதிக்கும் செயல். (அனைவரை சேர்த்துக்கொண்டு குதிப்பது)


அடுத்த வேறுபாடு : தோல் திட்டினால் நிகோடினை மட்டும் உட்கொள்கிறீர்கள். (அதாவது முதல் மாடியில் இருந்து குதிக்கிறீர்கள்) புகைபிடிப்பதால் அனைத்து நச்சு பொருட்களையும் உட்கொள்கிறீர்கள்

சுருங்க சொல்ல வேண்டுமானால்

• பொது இடங்களில் புகைபிடிப்பது : 
• 20ஆவது மாடியில் நின்று கொண்டு, நிற்பவர்களின் கால்களை உங்களுடன் சேர்த்து கட்டிக்கொண்டு கிழே குதிப்பது
  
• தனியாக அறைக்குள் புகைபிடிப்பது : 
• 20ஆவது மாடியில் நின்று கொண்டு, நீங்கள் மட்டும் கிழே குதிப்பது
  
• நிகோடின் தோல் திட்டு பயன்படுத்துவது : 
• முதல் மாடியில் நின்று கொண்டு, நீங்கள் மட்டும் கிழே குதிப்பது
  

இப்பொழுது புரிகிறதா

கேள்வி 15 : இந்த நிகோடின் தோல் திட்டு எங்கு கிடைக்கிறது. எவ்வளவு பணம் செலவாகும். கடைகளில் நேரடியாக பெற முடியுமா.
பதில் 15 : விசாரித்து எழுதுகிறேன்.

கேள்வி 16 : இந்த நிகோடின் தோல் திட்டு பயன் படுத்த எரிச்சலாக இருந்தால் என்ன செய்ய வேண்டும்

பதில் 16 : நிகோடின் உள்ள பிற பொருட்களும் விற்பனைக்கு உள்ளன

• நிகோடின் பசை Nicotine gum:  வாயில் மென்று கொண்டிருக்கலாம்
  
• நிகோடின் சுவாசிக்கும் கருவி Nicotine inhaler: விக்ஸ் இன்ஹேலர் போல் என்று வைத்துக்கொள்ளுங்கள்
  
• நிகோடின் மூக்கு தெளிப்பான் Nicotine nasal spray: ஆஸ்துமா நோயாளிகள் மருந்து உட்கொள்ள ஒரு கருவி வைத்திருப்பார்கள் அல்லவா. அது போல்
  
• நிகோடின் மாத்திரைகள் Nicotine tablet: நாக்கின் அடியில் வைக்க வேண்டியது தான்
  

கேள்வி 17 : எனக்கு மேலும் பல சந்தேகங்கள் இருக்கின்றன. என்ன செய்யலாம்
பதில் 17 : மறுமொழியில் கேளுங்கள். விளக்க முயற்சிக்கிறேன்

இந்த இடுகை உங்களுக்கு பிடித்திருந்தால் மறக்காமல் வாக்களிக்கவும்.

• தமிழிஷ் தளத்தில் வாக்களிக்க இந்த சுட்டியை ஒரு முறை மட்டும் சுட்டவும் (க்ளிக் செயயவும்)
• தமிழ்மணத்தில் ஆதரவு வாக்களிக்க கீழுள்ள கருவிபட்டையில் மேல்நோக்கியுள்ள கைவிரலை சொடுக்கவும்

எவ்வளவு பிடித்தது என்பதை கீழே உள்ள நட்சத்திரங்களை சுட்டுவதன் மூலமும் தெரிவிக்கலாம்

Opinion

இந்த வலைபதிவிற்கு நேரடியாக (உலாவி மூலம்) வராமல் செய்தியோடை மூலமாகவும் இடுகைகளை தொடர்ந்து வாசிக்கலாம். செய்தியோடையை பெற இங்கு சுட்டவும்